Luk3min
-
Job no.00032_例會
-
《四海兄弟：故鄉》玩後感/劇透慎
利申：PS5淺度業餘玩家，傾向看劇情，喜歡黑幫片。玩過《四海兄弟：決完版》
大概花了兩日時間足夠跑完整個遊戲。
遊玩性來說，對我嚟講算容易上手，今次多咗潛行擊殺、好似殺手47咁，能夠感應敵人位置、有得用硬幣或玻璃樽聲東擊西、偷襲、飛刀仔、塞啲body入木箱，玩法都幾似曾相識嘅。整體戰鬥算流暢，部分戰鬥都會想重溫。例如一人反轉幫派據點的鑄鐵廠或者跟住神父去下水道再去劇場大鬧一番做低對家大佬+牆頭草金主。身為玩家ok爽。
畫面就冇想像中咁靚，無聊揸車返去礦場度探索，發現有好多穿崩位，可能根本唔預人會探索……有少少失望。
睇過官方宣傳，演主角們嘅演員們本身都幾靚仔靚女，入到遊戲反而有少許失色。***
(以下包含扭曲解讀，請勿認真)
至於劇情，我本來期待嘅係男人之間的俠骨浪漫，結果同睇《夜半歌聲》嘅感覺係差唔多。
一開始男主角恩佐畀老豆賣豬仔做礦童，同監工兼斯帕達羅幫派頭馬反面隻揪，恩佐劃花人哋塊面再趁亂逃走到另一個幫派—托里西的地盤，好彩畀該幫派頭馬盧卡救咗返大宅，大佬同意收留恩佐。
每一套幫派片主角都要有好兄弟，嗰個就係大佬個侄仔—切薩雷。
(高配版保利www當我滿心歡喜以為恩佐會好似一般幫派片主角咁…為權力與錢財奮鬥向上爬……結果爬上大佬千金伊莎貝拉張床。呀Sorry，掉返轉，係伊莎貝拉夜襲恩佐先啱。但同時恩佐按照大佬嘅要求越殺越多人，開始做到懷疑人生。直到反戰派盧卡被對家隊冧咗，恩佐先明白，自己唔想再跟大佬做殺人兇手，只係想同伊莎貝拉共諧連理。
在幫派劇本中追求愛與自由是不是搞錯了什麼？？？？？
自古情義兩難全。如果恩佐你是個gay，或者可以同切薩雷手拉手入贅托里西家族，永享榮華富貴(???)結果悲劇收尾。切薩雷冇咗個兄弟、伊莎貝拉冇咗個老公、托里西閣下冇咗條命、西西里島火山爆發，當地最大幫派收皮，簡直係幫派片悲劇。我懷疑《四海兄弟：故鄉》係勸導大家唔好加入任何幫派嘅正向遊戲(?)
總括嚟講都幾好玩嘅，冇後悔入手，但爆機當日我忍唔住下載返《四海兄弟：決定版》嚟玩，平衡下心理。再見西西里島，我要返去Lost Heaven。
-
circle talk#8_【設計部為何不爆炸】三十回後記
2023年1月15日摘你個名呀串串貢結束。三日後，我在PNN開咗個新作頁面，名為「設計部為何不爆炸」，當時我仍在設計印刷公司工作，年資接近八年。當時自己工作狀態每況愈下，對習以為常的工作提不起勁、對忍耐各種潛規則感到厭倦。一想到下一個八年仍在苟延殘存，便生理不適、自我厭惡。
本來「設計部」的出現，只是因為在工作上與同事敢怒不敢言，就算敢言都叫天不應、叫地不聞，咁咪畫出嚟吐下烏氣囉，但係畫咗一兩回之後，覺得可以結合自己喜好認真畫下……結果一認真，就自我懷疑。「設計師」這個頭銜，我受唔受得起？我算不算是設計師？可能九成係砌稿，得一成係設計？咁我有咩資格做呢件事？之類嘅問題令我唔敢畫一個我已經做咗八年以上嘅職場故事……(計埋出版社、報社、雜誌社，其實都夠十年)
結果停咗好耐，耐到個個以為我棄坑。實情係死腦筋嘅我喺未搵到理由說服自己之前，唔會畫得出。
冇幾耐之後，我辭埋職。混亂咗一年幾，撈過好幾間公司，到最近先叫穩定返。接近一年冇新作嘅情況下，想重新整理設計部嘅故事。
而之前嘅糾結位，亦搵到一個自己能接受嘅答案。
或者我唔係國際標準嘅設計師，但我的確喺香港做咗好耐「設計師」。呢個唔係身份或敬稱，只係職銜。隨著時、地、人，名詞的定義有所不同。無可奈何，而我們這種「設計師」的確在香港這個地方存在過，為各種行業粉飾門面。我想說的故事只是這樣而已。(咁當然加埋自己啲癖好，唔係有咩人生樂趣？)
剛完成三十回，準備下一個十回之前反省下自己有咩地方做得唔好。
一，太耐冇畫嘢係真係會退步的，對唔住各位。
二，四格真係唔啱我，所以下個十回會畫返頁漫，一頁完的。(其實平均都有四格，只係格格唔同大小，有返啲節奏感)
三，顏色我唔知大家點睇，我覺得有改進空間，但可能要多少少時間試錯。所以最快幾時會更新呢？可能要等到十月。
因為呢排要忙書展漫節、進修嗰邊九月埋尾要做四件artwork。
嗯……盡量抽時間畫吧。最後謝謝您關注「設計部為何不爆炸」並看到這裡。
-
Job no.00030_仍在進行中
-
Job no.00029_正經啲
