鑽石山嘅荷里活廣場擺檔係一回咩事？

彩天漫墟後記

話說，鑽石山荷里活廣場舉行「彩天漫墟」，地點就腳，出於好奇就報咗檔。但報完之後即刻後悔，因為臨近書展，忙到仆街，根本冇時間準備。不過，既然報咗檔……就試下啦。

活動喺商場正中嘅大堂舉行，場內其實幾熱鬧，好多人行過，但問題係——佢哋真係「行過」。大部分人就算望一眼都算俾面，基本冇停低睇，更加唔會消費。

我一開始已經預咗冇生意，所以當日心態相當佛系。12點開場，擺好個陣，望住人來人往，感覺自己好似一個旁觀者。隔離位係一位少年，開住 laptop 播緊片，完全唔係嚟賣嘢，只係嚟 chill。呢個畫面令我更加懷疑自己：點解會喺咁忙嘅時候報呢個檔？

場內嘅攤位冇乜主題性，對面係賣周邊，隔離播片，後面賣手作飾品，感覺好似大雜燴。亂中有序幾有趣係咪？但對於吸引買家嚟講，真係冇乜幫助。

舞台活動大家玩得好投入，氣氛好好，但問題係，舞台音量唔細，個場震震下，搞到我同朋友傾句計都要大大聲，對攤主嚟講有少少折磨。雖然熱鬧係好事，但呢種場面，唔太適合交流。

幸好有幾位朋朋今日嚟探班，陪我吹咗陣水，令我冇咁悶。雖然大家都知道冇生意，但起碼有人嚟支持下，都幾窩心。如果冇佢哋，我估我可能再早啲收檔，多謝你哋。

最終，兩點收工。

擺檔冇乜驚喜，活動氣氛有交代，但攤主同買家都係靠緣份。個市好差呢樣嘢，聽就聽得多，之前忙返工唔覺，今日見下人就好覺。相信主辦花咗唔少心力去搞活動，但結果可能係熱鬧歸熱鬧，攤主賺唔賺錢就見仁見智啦。

下次真係唔好喺自己忙到仆街嘅時候報檔，就算地點就腳都唔好。

圍唔到皮會影響自己創作心情就唔好出去擺檔，照顧好自己心情先。

所以我應該唔會亦唔得閒再擺檔。哈哈哈哈。