老攤主的隨筆：參展嘅心態與選擇

我都算係一名老攤主啦，老到有時候企喺同人場都會覺得有啲唔好意思，咁多年嚟，參展對我嚟講，早已唔係單純嘅「擺攤」。

點解要參展？唔係為咗說教，純粹想分享下自己嘅感受同諗法。

攤主嘅心態：從創作者出發

成為攤主之前，我係一個創作者，而喺轉化成創作者之前，我只係一個同人女。 從二創嘅參展模式轉換到原創嘅參展模式，我花咗一段時間先摸索到中間嘅分別及不對勁 。

二創往往係季節性跟住大勢走，作品同參展嘅節奏大多數都係圍繞住當時流行嘅 IP。當然你識得我耐就知…其實我都係唔9理，鐘意就照出。但原創唔同，原創嘅時間計法係由你自己話事，步伐節奏完全掌握喺自己手上。呢個自由，係原創最舒服嘅地方，但同時會帶嚟抉擇嘅煩惱，特別係參展嘅時候。

參展本質上應該係一個平台，俾我哋攞自己嘅心血出嚟，分享畀讀者或同好，帶畀雙方快樂與共鳴。但有時我都會問自己，如果無新品，參展做乜？ 係為咗「佔個位」？定係為咗俾人覺得你一定會喺度？「習以為常」嘅感覺會令我有啲不安。

我覺得，參展有新作品會比較理想，而唔係為咗唔想俾人忘記，就不斷喺場上出現。有機會淪為「你永遠都喺度，咁我下次買都得啦。」  我哋嘅作品，至少應該係自己都覺得有價值、有意思嘅，而唔係攞啲連自己都唔會買嘅嘢去「交功課」。

「逢展必到」的代價

我曾經有「逢展必到」嘅時期，當時覺得，參展係攤主嘅「必須動作」。嗰陣嘅展規模無而家咁多、咁散，但都已經夠令我嘅精神狀態極唔健康。

啲展一個接一個，自己就好似永遠追唔上咁，日日試圖趕稿、試圖逼自己有新刊，展前極度焦慮，出唔成又會有罪惡感。結果搞到自己無時間休息，無時間沉澱，甚至無時間真正享受創作嘅過程。到最後，攤係set咗喺度，但我個人已經冇晒熱情，亦冇人對我個檔有興趣。經歷過呢啲九唔搭八嘅個人選擇後，我開始學識放慢腳步，唔再參加所有展，而係選擇啲真正適合自己嘅場合。作品質量有冇因為呢個選擇而提高到就唔知，不過心態輕鬆咗係真嘅。

為咗乜嘢參展？選擇嘅重要性

參展係一個選擇，而唔係一個必然。 每次參展之前，問自己幾個問題：

呢場展適唔適合我？ 呢場活動嘅風格、目標讀者、場地氣氛，係咪同我嘅作品夾？如果答案係「唔啱」就慳返。

我有啲值得展示嘅嘢嗎？ 如果無新品，或者覺得手頭上啲嘢一般般，咁倒不如留返啲時間同精力，等下次準備好再去。

能量管理：謝絕過度消耗

創作係一件需要投入好多精力嘅事，而呢啲能量唔係無限。需要時間去沉澱，去諗清楚自己想做啲咩，而唔係畀展覽牽住走。

我覺得保留能量係一件好重要嘅事。與其每場都去，不如先集中做好作品， 當你帶住新作品同熱情去參展，讀者係會感受到，嗰種交流同互動嘅質量會好唔同，尤其是做原創類，不像二創要追風潮，並沒有太大時間限制。

點解要揀適合自己嘅活動？

活動種類好多，唔同搞手有自己風格。同時，同一樣嘢放喺唔同地方，價值係會唔同。

如果作品準備好都係蟹的話，問題未必完全出喺自己身上，諗下有冇將自己置於合適的地方同樣重要。

唔係每場展都值得去，亦唔係每次都需要參加。選擇一啲真正幫到自己嘅場合。

享受參展嘅快樂

參展對我嚟講，最開心梗係見返舊雨新知、同埋大叫完售啦！但呢份快樂嘅基礎，係作品同心態。如果可以帶住好作品參展，每一次都值得期待。

而家我唔會再追求參加所有展覽(體力同時間都搞唔掂)，反而想專注創作內容，並將作品整合喺呢個網站上。

對我嚟講，呢個地方就係我個攤。

掛住我咪上黎望下囉。